För een plattdüütsch Tokunft  Jedeen Dag tosamen platt räden - dat wulln de Prignitzer, de to´n iersten nedderdüütschen Regionaldräpen in Wittstock binanner west sünd. Veertig Lüüd hemm sik in Ratsaal dröpt, üm uns Regionalsproak to helpen. Nich all künn Platt räden, awer all künn Platt verstaohn un wulln, dat Platt wedder  Deel van uns Alldag ward. To´n Bispeel will Ricarda Hergass ut de Bökeri mehr Lüüd för dat Plattdüütsch Eck gewinn, de Volkshochschul-Köstersche Anke Unkeholt hett nu nich blot een, nee 3 Kurse Plattdüütsch in Wittstock, Kyritz un Wusterhusen. Ok Buer Hans-Heinrich Grünhagen, de nach de Wenn ut Neddersassen komen is, hett utplappert, dat he mit plattdüütsch upwassen is. Dat hett ehm hulpen, as he in Brannenborch anfangen hett.

                                                                                                         Nu sünd all Plattfrünn in sien Dörp storven un so ohn Platt sall dat nich wierergoahn. Sien Kartoffeln verköfft he as "Prignitzer Tüffeln und up sien Maschien steiht "Tüffel-Büffel" - nu weet jedeen, dat he een Plattdüütschen is.

Ortsvorsteher Martin Schäfer is stolt, dat Sewkow sien plattdüütschen Noam Sävko teigen kunn und will sich nu daför insetten, dat dat ok annorts Ortsschiller mit Platt upstellt warrn.

Ok Ulla Berndt - dat Plattüütsch Urgestein ut Potlitz- hett sich dat nich nöhm laten und een paor Woer to rädn. Johr för Johr is se mit Potlitzer Kinner noah Magdeburg föhrt, wiel da een Plattdüütsch-Läs-Wettstriet was. In Brannenborch hemm wi ierst 2014 unsen Lannesvereen billt. Kloar, dat Ulla gliecks doarbi was. Kort vör ehr´n 80. liehrt se noch Platt an de Grundschool. Se hett dissen Abend ehr Nachfolgerin mitbröcht - Dorén Schmidt, de Schoolleiterin.

Et goaht wierer in Potlitz un ook in`t Lann. Een Nedderdütsch-Gesett is bi´t Lann in Arbeet. All in Ratssaal wulln nu uppassen, dat Plattdüütsch  nich wedder rinleggt warrt.